काठमाडौं । आईसीसी टी–२० विश्वकपमा सहभागी नेपाली राष्ट्रिय टिमलाई प्रोत्साहित गर्न वाइ वाइ चाउचाउले ठूलो राशीको पुरस्कार घोषणा गरेको छ । वाइ वाइ चाउचाउले जारी विश्वकपको सुपर–८ मा नेपाल पुग्न सफल भएमा नेपाली राष्ट्रिय टिमलाई नगद ३० लाख पुरस्कार दिने घोषणा गरेको हो ।

यस्तै खेलाडीको मनोवल उच्च बनाउन प्रत्येक रन बनाएवापत १ हजार, प्रत्येक चौका वापत ८ हजार, प्रत्येक छक्का वापत १२ हजार, प्रत्येक विकेट वापत १५ हजार, प्रत्येक अर्धशतक वापत ५० हजार, प्रत्येक शतक वापत १ लाख र नेपाली टिमको प्रत्येक जितमा १ लाख ५० हजार रूपैयाँ नगद उपलब्ध गराउने पनि घोषणा गरेको छ । यसबारेमा सीजी फुड्स नेपाल लिमिटेड र क्यानवीच सम्झौतापत्रमा हस्ताक्षर भएको छ ।
चौधरी गु्रप अन्तर्गतको सीजी फुड्सले विगत २० वर्षदेखि नेपालको यू–१९ क्रिकेटको प्रायोजन पनि गर्दै आएको छ ।
चौधरी ग्रुपका प्रवन्ध निर्देशक निर्वाण चौधरीले वाइ वाइले विगत २० बर्षदेखि नेपाली क्रिकेटको विकासमा सहयात्रा गरिरहेको बताएका छन् ।