काठमाडौँ । सोनाम ल्होसारको अवसर पारेर गायक विजय लामाले राजधानीको टुँडिखेलमा साङ्गीतिक प्रस्तुति दिने भएका छन् ।

२८ सय ६१ औँ सोनाम ल्होसारको अवसरमा माघ १७ गतेका दिन टुँडिखेलमा गायक लामाले आफ्नो व्याण्डसहित एकल साङ्गीतिक प्रस्तुति दिने छन् । विजय लामा एण्ड द व्याण्डको प्रस्तुति रहने कार्यक्रममा गायक लामाले आफ्ना चर्चित गीतहरू नखानु पानी तोङबाको, उँभो उँभो लेकमा म जाँदा, रोसी खोला पारी, माया है बस्ला रसैले लगायतका १ दर्जन बढी गीतहरू गाउने छन् । लोसार मूल समारोह समितिको आयोजनामा हुन लागेको साङ्गीतिक कार्यक्रमको व्यवस्थापक नमस्ते साउण्ड रहेको छ । 

यसैबिच टुँडिखेलको कार्यक्रम सकिए लगत्तै भोलीपल्ट नै गायक लामा साङ्गीतिक प्रस्तुतिका लागि दुबई उड्नेछन् । उनले फेब्रुअरी १ तारिखका दिन दुबईको क्लब याक एण्ड यती एभरेष्ट बर दुबईमा एकल साङ्गीतिक प्रस्तुति दिने कार्यक्रम रहेको छ । जसको आयोजक दुबई नेपाली रक्स रहेको गायक लामाले जानकारी दिए । पछिल्ला दिनमा सामाजिक काममा पनि व्यस्त गायक लामाले देशभरका गरिब  र बाबु आमा नभएका असहायहरूका लागि पनि काम गरिरहेका छन् ।