काठमाडौं । प्रहरीले डा. निकोलस भुसाललाई पक्राउ गरेको छ । उनलाई आइतबार साँझ काठमाडौं उपत्यका अपराध अनुसन्धान कार्यालयले काठमाडौंको थलीबाट पक्राउ गरेको हो ।

कास्की प्रहरीको हिरासतमा सुतिरहेका पूर्वगृहमन्त्री तथा राष्ट्रिय स्वतन्त्र पार्टी (रास्वपा)का सभापति रवि लामिछानेको फोटो खिचेर सार्वजनिक गरेको आरोपमा उनी पक्राउ परेका हुन् । प्रहरीको सिसिटिभीमा देखिएको लामिछानेको तस्बिर खिचेर भुसालले सामाजिक सञ्जालमा सार्वजनिक गरेका थिए ।

फोटो सार्वजनिक भएपछि गृहमन्त्री रमेश लेखकले घटनाको छानबिन गर्न निर्देशन दिएका थिए । त्यसपछि कास्की प्रहरीले विज्ञप्ति जारी गर्दै भुसालको कदमले साइबर कानुनको उल्लंघन गरेको जनाएको थियो । पक्राउ परेका भुसाललाई थप अनुसन्धानका लागि पोखरा पठाइने भएको छ ।