काठमाडौं ।  भारतकी ‘प्लानेट मिस इन्डिया वर्ल्ड २०१८’ नव्याश्री र दुर्गेश थापा अभिनीत ‘रूपकी रानी, शेरको राजा’ बोलको म्युजिक भिडियो सार्वजनिक भएको छ । शुक्रवार सार्वजनिक यो गीतमा कृष्ण केसी र सदिक्षा कट्टेलले स्वर दिएका छन् । सङ्गीत कृष्ण केसीको रहेको छ भने शब्द रचना नव्याश्री आफैँले गरेकी हुन् । म्युजिक कड प्रोग्रेसन मदन केसीले गरेका छन् भने गीतको मिक्सिङ र मास्टरिङ श्यामश्वेत रसाइलीले गरेका छन् ।  भिडियोको निर्देशन, सम्पादन र भिएफएक्स क्रान्ति केसीले गरेका छन् । छायाङ्कन अजय रेग्मीले गरेका हुन् भने एक्सन निर्देशन रमेश मगरले गरेका छन् । कोरियोग्राफी देवराज सापकोटाको रहेको छ। साथै, मेकअप राकेश रणपालले गरेका छन् । 

कोलकातामा जन्मेकी नव्याश्री दार्जिलिङकी स्थायी बासिन्दा हुन् । ९ वर्षको उमेरमा पिताको निधनपछि उनी र उनकी आमाले जीवनमा धेरै चुनौतीहरूको सामना गर्नुपर्‍यो । नव्याश्रीकी आमा तुलसाले परिवारको सम्पूर्ण जिम्मेवारी बहन गर्दै उनलाई मोडलिङ र अभिनय क्षेत्रमा अघि बढ्न प्रेरित गर्दै आएकी छन् ।

बाल्यकालदेखि नै अभिनय र मोडलिङमा रुचि राख्ने नव्याश्रीले १५ वर्षको उमेरमा ‘प्लानेट मिस इन्डिया वर्ल्ड २०१८,’ ‘मिस टिन रिपब्लिक अफ इन्डिया २०१८,’ र ‘मिस नोटिस २०१८’ जस्ता सौन्दर्य प्रतियोगिताहरू जितेकी थिइन् ।