‘मायालु तिमी कता छौ’ लगायत हिट गीतहरुकी गायिका स्मिता दाहालले आफ्नो मायालु फेला पारेकी छिन् । पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’की नातिनी समेत रहेकी स्मिताले आफ्नो इन्स्टाग्राममार्फत सो जानकारी दिएकी हुन् ।

गायिका दाहालले बबरमहलका सायुज्य श्रेष्ठसँग केही दिनअघि मात्रै इन्गेजमेन्ट गरेकी हुन्। स्मिताले इन्स्टाग्राममा तस्विर राख्दै सायुज्य आफ्नो जीवनसाथी हुन लागेको जानकारी दिएकी छिन्।

‘‘मेरो माया, कलेजको बेन्चहरूमा लुकेर हेराहेर गर्दादेखि सधैँको लागि योजना बनाउँदासम्म। हामीले मात्र बुझ्न सक्ने यो हाँसो, अबेर रातिसम्मको कुराकानी र शान्त क्षणको यात्रा। साथीदेखि मेरो माया र अहिले सधैँको लागि। तिमीले ल्याएका हरेक खुसीको लागि धन्यवाद,’ उनले लेखेकी छिन्।

दाहालले अगाडि लेखेकी छन्, ‘मेरो औंला वरिपरि बेरिएको वाचाको लागि र मलाई संसारको सबैभन्दा भाग्यशाली हृदय बनाएकोमा धन्यवाद। यहाँ हाम्रो सुरुवातको लागि, यी हातले बनाएका सपना, माया, हाँसो र अनन्त सुन्दर सम्झनाको जीवनको लागि। म तिम्रो हुनको लागि पर्खन सक्दिन, सधैँ र सधैँ।’

स्मिता छिट्ट प्रेमी श्रेष्ठसँग वैवाहिक बन्धनमा बाँधिने भएकी छिन्। गोकर्णस्थित नर्लिङ रिसोर्टमा उनीहरूको विवाह समारोहको आयोजना हुने बताइएको छ । यद्यपि मिति भने सार्वजनिक गरिएको छैन ।

प्रचण्डपुत्री गंगा दाहालकी छाेरी स्मिताले अन्तर्राष्ट्रिय बजार व्यवस्थापन विषयमा स्नातकोत्तर गरेकी छिन्। एमबीए अध्ययन गरेका सायुज्य भने व्यवसायी हुन्।