भोजपुर । जिल्लाको कुल नौवटा स्थानीय तह मध्ये नेपाली काँग्रेस र नेकपा एमालेले चार-चार वटा स्थानीय तह तथा नेकपा माओवादी केन्द्र एउटा तहमा विजयी भएको छ । काँग्रेस दुई नगरपालिका र दुई गाउँपालिकामा, एमाले चारवटा गाउँपालिका तथा माओवादी केन्द्र एउटा गाउँपालिकामा विजयी भएको छ । काँग्रेस षडानन्द र भोजपुर नगरपालिका तथा अरुण र साल्पासिलिछो गाउँपालिकामा विजयी भयो भने एमाले ट्याम्केमयुङ, हतुवागढी, पौवाजुम्बा र रामप्रसाद राई गाउँपालिकामा विजयी भएको छ ।

माओवादी केन्द्र आमचोक गाउँपालिकामा विजयी भएको छ । यस्तै षडानन्द नगरपालिकाको प्रमुखमा नेपाली काँग्रेस विजयी भएको छ भने उपप्रमुखमा एमाले विजयी भएको छ ।

नगर प्रमुखमा वीरबल राई चार हजार ९८६ मत ल्याई विजयी भएका छन् । उनका निकटतम प्रतिद्वन्द्वी नेकपा एमालेका सुरेन्द्र उदासले चार हजार ६९४ मत प्राप्त गरे । उपप्रमुखमा एमालेकी मेरिका राई चार हजार ६९७ मत ल्याई विजयी भइन् भने निकटतम प्रतिद्वन्द्वी काँग्रेसकी सीता श्रेष्ठले चार हजार ४१३ मत प्राप्त गरिन् ।