काठमाडौं । चिलीलाई पराजित गर्दै विश्व विजेता जर्मनीले फिफा कन्फेडेरेसन कप फुटबलको उपाधि जितेको छ ।
गएराति रुसको सेन्ट पिटर्सबर्गमा भएको फाइनलमा कोपा अमेरिका विजेता चिलीलाई १–० ले हराउँदै जर्मनीले पहिलो पटक फिफा कन्फेडेरेसन कपको उपाधि जितेको हो ।

खेलको २० औं मिनेटमा लार्स स्टिन्डलले गरेको गोल नै जर्मनीको जितमा निर्णायक बन्यो । चिलीका मार्सेलोलो दिएजको गल्तीको फाइदा उठाउँदै स्टिन्डलले गोल गरेका हुन् । फाइनलअघि तेस्रो स्थानका लागि भएको खेलमा मेक्सिकोलाई २–१ ले हराउँदै पोर्चुगल तेस्रो भयो । पोर्चुगलका लागि पेपे र एड्रियन सिल्भाले गोल गरे ।

खेलको अन्तिम समयमा चिलीले सुनौलो अवसर खेर फालेपछि जर्मनीको युवा टोलीले जर्मन फुटबलको इतिहासकै पहिलोपटक कन्फेडेरेसन कपको उपाधि जित्न सफल भएको हो । यसअघि युरोपियन टोलीका रुपमा फ्रान्सले कन्फेडेरेसन कपको उपाधि जितेको थियो ।