काठमाडौं । पाटन उच्च अदालतले ‘लाज शरणम्’ को प्रचारप्रसारमा रोक लगाएपछि ट्रेलर सार्वजनिक गर्ने कार्यक्रम स्थगित मात्र भएन यो विवादले टिभी श्रृंखला ‘सक्किगो नि’को ९१ औं भाग पनि प्रसारण रोकिएको छ । अदालतको आदेशलाई आत्मसात गर्दै प्रसारण गर्न असमर्थ भएको ‘सक्किगो नि’ टिमले जनाएको छ ।

पूर्वमन्त्री अफताव आलमको रिटमा सुनुवाई गर्दै मंगलबार पाटन उच्च अदालतले चलचित्रको प्रचारप्रसारमा रोक लगाएको थियो । अदालतको आदेशकै कारण बुधबार चलचित्रको टिमले युट्युबबाट टिजर र गीत पनि हटाइसकेको छ । उच्च अदालत पाटनको आदेशसँगै चलचित्र ‘लाज शरणम्’ प्रदर्शन हुन्छ कि हुँदैन भन्ने चासो बढेको बेला अहिले चलचित्र केन्द्रीय चलचित्र जाँच पास समिति (सेन्सर बोर्ड) पुगेको छ । बोर्ड सदस्य ऋषिराज आचार्यका अनुसार अहिले जाँच पास समितिका सदस्यले चलचित्र हेर्दैछन् । सेन्सर बोर्डले चलचित्र प्रदर्शनका लागि उपयुक्त छ कि छैन भनेर जाँच पास प्रमाण पत्र दिने छ ।

उच्च अदालत पाटनले केन्द्रीय चलचित्र जाँच पास समिति (सेन्सर बोर्ड)बाट सेन्सर नभएसम्म प्रचार नगर्न अन्तरिम आदेश दिएको थियो । अब सेन्सर बोर्डले गर्ने निर्णयले चलचित्र प्रदर्शनको अन्यौलता हटाउने छ ।
सेन्सर बोर्डले प्रदर्शन अनुमति दियो भने यो चलचित्र प्रदर्शन हुनेछ । आलमसँग हुबहु मिलेको भन्दै सेन्सर बोर्डले त्यसलाई हटाउन भनेको खण्डमा भने निर्माणपक्ष अफ्ठ्यारोमा पर्नेछ । चलचित्र ‘लाज शरणम्’ को मुद्दालाई लिएर ‘नेपाल चलचित्र निर्देशक समाज’ले आपत्ति जनाएको थियो । चलचित्र निर्देशक समाजका अध्यक्ष जनकदीप पराजुलीले जारी गरेको बिज्ञप्तीमा चलचित्र ‘लाज शरणम्’को प्रचार सामग्री रोक्न आदेश दिएकोप्रति गम्भीर ध्यानाकर्षण भएको जनाएका छन् । फाट्टफुट्ट आएका प्रचार सामग्रीको भरमा उच्च अदालत पाटनले चलचित्रमाथि अंकुश लगाउने आदेश दिएको आरोप विज्ञप्तिमा उल्लेख छ ।