काठमाडौँ – गत सोमबार टर्कीमा भूकम्प गएपछि लुटपाटका घटना बढेका छन् ।

लुटपाटमा संलग्न भएको आरोपमा ४८ जनालाई प्रहरीले पक्राउ गरेको हो । भूकम्पका कारण विस्थापितहरु थप मारमा परेकै बेला लुटपाटको घटना बढ्दा भूकम्प पीडितहरु थप मारमा परेका छन् ।

लुटपाटका घटना बढ्न थालेपछि टर्की सरकारले अनुसन्धानका लागि एक कमिटी गठन गरेको छ। कमिटीको अनुसन्धानपछि ८ वटा अलग–अलग प्रान्तबाट संदिग्ध ४८ जनालाई पक्राउ गरिएको हो ।

यसअघि टर्कीका राष्ट्रपति रेचेप तैयप एर्दोआनले लुटपाट लगायतका अपराधमा संलग्नलाई कडा कारबाही गर्न निर्देशन दिएका थिए । भूकम्पपछि राष्ट्रपति एर्दोआनले टर्कीका १० प्रान्तमा ३ महिनासम्मका लागि संकटकाल घोषणा गरिसकेका छन् ।