सभामुख देवराज घिमिरे आज बहराइन जानुहुने भएको छ । आगामी फागुन २७ देखि चैत २ गतेसम्म आयोजना हुने अन्तर–व्यवस्थापिका सङ्घको १४६ औँ बैठकमा भाग लिन सभामुख घिमिरे बहराइन जान लाग्नु भएको हो । सभामुखमा निर्वाचित भए पछि घिमिरेको यो पहिलो विदेश भ्रमण हो ।

नौ सदस्यीय नेपाली प्रतिनिधिमण्डलको नेतृत्व गर्दै आज सभामुख घिमिरे बहराइन जान लाग्नु भएको सङ्घीय संसद् सचिवालयले जनाएको छ । सभामुख घिमिरेले नेपालको तर्फबाट सो बैठकमा सम्बोधन गर्ने कार्यक्रम तय भएको संसद् सचिवालयलका सहप्रवक्ता दशरथ धमलाले जानकारी दिनुभयो ।

सभामुखको प्रतिनिधिमण्डलमा नेपाली कांग्रेसका मुख्य सचेतक रमेश लेखक, नेकपा एमालेका राष्ट्रियसभा सदस्य इन्दु खकडरीया, नेकपा (माओवादी केन्द्र) का प्रमुख सचेतक हितराज पाण्डे र राष्ट्रिय स्वतन्त्र पार्टीका प्रमुख सचेतक सन्तोष परियार तथा संसद् सचिवालयका महासचिव भरतराज गौतम र प्रतिनिधिसभाका सचिव गोपाल योगी सहभागी हुने तयारि गर्नु भएको छ ।