रौतहट । महिलामाथि दुर्व्यवहार गर्न खोजेको आरोपमा रौतहटमा सशस्त्र प्रहरी बेस गौर भन्सारमा कार्यरत सहायक हवलदार दिलिप श्रीवास्तव पक्राउ परेका छन् । शुक्रबार राति ११ बजे सदरमुकाम गौर स्थित ती महिलाको घरमा बलजफ्ती प्रवेश गरी मुख थुनेर दुर्व्यवहार गर्न खोजेपछि महिला गुहार माग्दै चिच्याएकी थिइन् ।

सहायक हवलदार श्रीवास्तवको आक्रमणको कारण महिलाको अनुहारका अधिकांश भागमा कोतारिएका छन् । घटनावारे थाहा पाएपछि घरका सदस्यहरुले श्रीवास्तवलाई नियन्त्रणमा लिएर आवश्यक कारवाहीको लागि जिल्ला प्रहरी कार्यालय रौतहटमा बुझाएका छन् ।

सशस्त्रका सहायक हवलदार श्रीवास्तवले रक्सी खाएर महिलाको घरमा पसेको पीडित पक्षले जनाएको छ । प्रहरीको नियन्त्रणमा रहेका सशस्त्रका सहायक हवलदार श्रीवास्तवलाई सशस्त्र प्रहरी बेस बिओपी गौर भन्सारका सशस्त्र प्रहरी निरीक्षक अमर लामाले कारबाहीका लागि बुझाउन माग गरेका छन् ।