मुम्बई । अभिनेता प्रभासको दक्षिण भारतीय फिल्ममा आफ्नो दबदबा चल्छ । ‘बाहुबली २’को सफलताको ६ वर्षपिछ प्रभासले सन् २०२३ मा ब्लकबस्टर फिल्म ‘सालार पार्ट १’ दर्शकलाई दिए । अब भने दर्शकले उनको फिल्म हेर्न केही समय पर्खनुपर्नेछ । किनकी उनी अब केही समयका लागि अभिनयबाट ब्रेक लिँदैछन् ।

प्रभासले ‘सालार’को सफलतापछि केही समयका लागि अभिनयबाट ब्रेक लिने निर्णय लिएका हुन् । अर्को फिल्म ‘कल्की २८९८ एडी’ अघि प्रभासले यो निर्णय किन लिए भन्ने कारण पनि छ । प्रभासले ‘माइण्ड फ्रेस’ र स्वास्थ्यका कारण अभिनयबाट ब्रेक लिएका हुन् ।

प्रभास ‘सालार’बाट प्राप्त प्रतिक्रियाबाट खुसी छन् । ६ वर्षपछि प्राप्त सफलताले पनि प्रभासलाई खुसी दिएको हो । उनी आफ्नो करियरमा अझ बढी केन्द्रीत हुन र आन्तरिक शक्ति बढाउन ब्रेक लिन लागेका हुन् । उनी अब नयाँ तरिकाबाट करियरलाई अगाडि बढाउन चाहन्छन् ।

त्यसो त प्रभास लामो समय ब्रेक लिने मुडमा छैनन् । उनी केवल एक महिनामात्र अभिनयबाट अलग्गिँदै छन् । उनी मार्चमा आफ्नो आगामी प्रोजेक्टको काम सुरु गर्ने मनस्थितिमा छन् । उनी आफ्नो सर्जरीका लागि युरोप जाने तयारीमा छन् । उनलाई केही समयअघि चोट लागेको थियो, त्यो चोट पूर्ण रुपले ठीक हुन सकेको छैन ।

प्रभासको लाइनअपमा ९ मार्च २०२४ मा रिलिज हुने फिल्म ‘कल्की २८९८ एडी’ छ । जसमा दीपिका पादुकोण, कमल हासन, अमिताभ बच्चन र दिशा पाटनीको अभिनय छ । यसबाहेक ‘स्पिरिट’ र ‘द राजा साहब’ पनि पाइपलाइनमा छन् ।