काठमाडौं । नेपाल प्रिमियर लिग (एनपीएल)मा पोखरा एभेन्जर्सले विराटनगर किंग्सलाई सुपर ओभरमा १३ रनले हराएको छ । बिहीबार कीर्तिपुरमास्थित त्रिवि क्रिकेट मैदानमा सम्पन्न खेलको सुपर ओभरमा पोखराले विराटनगरलाई १९ रनको लक्ष्य दिएको थियो तर विराटनरले ६ बलमा पाँच रनमात्र बनाउन सक्यो ।

पोखराबाट बलिङमा रेमोन रेफर आएका थिए । उनको पहिलो बलमा विराटनगरका मार्टिन गप्टिलले एक रन लिए । तेस्रो बलमा पनि गप्टिलले एक रन नै लिए । दोस्रो बलमा विराटनगरका निकोलस किर्टोनले पनि एक रन नै लिए । चौथो बल रेफरले डट फ्याँके । पाँचौँ बलमा किर्टोनले एक रन लिए । अन्तिम बलमा रेफरले वाइड फ्याके । पुनः अन्तिम बल रेफरले डट राखेपछि पोखराले सुपर ओभरमा १३ रनको जित निकालेको हो ।

सुपर ओभरमा पहिले ब्याटिङमा आएको पोखराले ६ बलमा १८ रन बनाएको थियो । सुपर ओभरमा पोखराका रेमोन रेफरले १७ र आन्द्रियस गौसले एक रन बनाए । त्यसअघि, टस जितेर ब्याटिङमा आएको विराटनगरले पहिलो इनिङको निर्धारित २० ओभरमा सात विकेट गुमाएर १३९ रनको योगफल खडा गरेको थियो । १४० रनको लक्ष्यसहित मैदान उत्रिएको पोखराले पनि निर्धारित २० ओभरमा ६ विकेट गुमाएर १३९ रन नै बनाएपछि खेल सुपर ओभरमा पुगेको हो ।