दिउँसो होस् या रात

घाम होस् या जून

सिर्जनाको उज्यालो

घामभन्दा न्यानो

टहटह जूनभन्दा प्यारो

रातको अन्तिम प्रहरलाई

पहरा दिएको मान्छे

धर्तीको सबभन्दा अग्लो मुलुकबाट

चियाइरहेको मान्छे

खोजिरहेको छ, हेरिरहेको छ

केवल सिर्जना, मात्र सिर्जना ।

तर त्यसलाई त बन्धकीमा राखेछन्

हल्लै हल्लाको होहल्लाबीच

एउटा रोमाञ्चकारी अनुष्ठान गरेर

विसर्जनको लावालस्कर

कहिले नसकिने पट्यारलाग्दो जात्रा

नयाँ युगको सारंगी रेटेर

न सुर छ, न ताल

ताल सुर नमिलेको त्रिताल

मुलुक नै विसर्जनको यात्रामा हेलिएको बेला

त्यहाँ के को प्रज्ञा ?

के को सिर्जना ?