काठमाडौँ । आइतबार दिउँसो उपत्यकासहित धेरैजसो ठाउँमा हल्का पानी पर्ने सम्भावना रहेको मौसमविदले जानकारी दिएका छन् । धेरैजसो ठाउँको मौसम अहिले बद्ली भएको र दिउँसोपख पानी पर्ने सम्भावना रहेको मौसमविद मिनकुमार अर्यालले बताए ।

सुदूरपश्चिमका सबैजसो ठाउँमा पानी पर्ने सम्भावना रहेको उनले बताए । पश्चिमी वायुको प्रभावका कारण उच्च पहाडी तथा हिमाली भेगमा आइतबार हिमपातको पनि सम्भावना छ ।

केहीदिन यता काठमाडौको तापक्रम बढ्दै गएको छ । शुक्रबार र शनिबार काठमाण्डौको अधिकत तापक्रम २५ डिग्री सेल्सियससम्म पुगेको थियो । बिहीबार काठमाण्डौको अधिकतम तापक्रम २२ दशमलव ८ डिग्री सेल्सियस मापन गरिएको मौसम पूर्वानुमान महाशाखाले जनाएको छ ।

आइतबार र सोमबार देशभर नै बद्लीको सम्भावना रहेकाले तापक्रम घट्ने सम्भावना रहेको मौसमविद् अर्यालले बताए ।