आगामी नोभेम्बरमा हुने एसीसी १९ वर्ष मुनिको एसिया कपको छनौट खेल अन्तर्गत इस्टर्न रिजन क्रिकेटमा सहभागी हुन नेपाली युवा टोली आज मलेसिया प्रस्थान गरेको छ । आगामी आइतबारदेखि हुने प्रतियोगिताका नेपाल समूह एमा परेको छ ।

यस समूहमा नेपालसँगै भुटान, सिंगापुर र थाइल्याण्ड छन् । समूह बीमा आयोजक मलेसियासहित चीन, हङकङ र म्यानमार छन् । नेपालले प्रतियोगिताको उपाधि जित्ने लक्ष्य लिएको छ । प्रतियोगिताको उपाधि बिजेताले आगामी नोभेम्बरमा हुने एसीसी १९ वर्ष मुनिको एसिया कपमा स्थान बनाउनेछ ।

इस्टर्न रिजन र वेस्टर्न रिजनका बिजेता टोलीले एसिया कपमा टेष्ट मान्यता प्राप्त श्रीलंका, भारत, बंगलादेश र पाकिस्तानका युवा टोलीसँग प्रतिस्पर्धा गर्नेछन् । एक महिना अघिदेखि तयारी थालेको नेपालको कप्तानी दीपेन्द्रसिंह ऐरीले गर्नेछन् । मुख्य प्रशिक्षक बिनोद दास र सहायक प्रशिक्षक कलाम अली छन् ।