जर्मनीको शीर्ष डिभिजनको फुटबल बुन्डेसलिगामा हेर्था बिएससीलाई १–० गोल अन्तरले पराजित गरी बोरुशिया डर्टमन्डले पहिलो स्थानको बायर्न म्युनिखसँगको अंक दूरी कम गरेको छ ।

गएराति भएको खेलमा घरेलु टिमका लागि एम्रे कानले गरेको गोल नै निर्णायक बन्यो । उनले खेलको ५७ औं मिनेटमा गोल गरेका थिए ।

जितसँगै डर्टमन्डको ३० खेलबाट ६३ अंक भएको छ । शीर्ष स्थानमा रहेको बायर्खको ७० अंक छ ।

लिगमा चार खेल बाँकी रहँदा लगातार ९ पल्ट बुन्डेसलिगा उपाधि जित्न बायर्नलाई मात्र २ जित आवश्यक छ ।

शनिबार नै भएको खेलमा बायर्नले बायर लिभरकसेनलाई उसकै मैदननमा ४–२ गोलले हराएको थियो ।

शनिबार रातिको अर्को खेलमा रेलिगेसनबाट जोगिन संघर्षरत फर्चुना डसेलडर्फले मिड टेवलमा रहेको होफेनहेमसँग २–२ गोलको बराबरी खेल्दै अंक बाँडेको छ ।