काठमाडौं– चैत १५ गते शुक्रबार राजावादीहरुको प्रदर्शनलाई हिंसात्मक बनाएर फरार रहेका दुर्गा प्रसाईले आफू काठमाडौंमै सुरक्षित बसेको स्पष्टिकरण दिएका छन् ।

आज सामाजिक सञ्जाल फेसबुक लाइभमा आएर उनले आफूलाई देख्ने बित्तिकै गोली हान्ने प्रधानमन्त्रीको निर्देशन भएको हुँदा काठमाडौंकै कुनै मन्दिरमा सुरक्षित बसेको बताएका छन् । उनले आफूहरू कार्यक्रमस्थल पुग्नुभन्दा अघि नै स्टेजमा बाटोबाटै गोली र टियर ग्यास हान्न थालेको दावी गर्दै आफ्नै गाडीमा टियर ग्यास हानेपछि कि त यिनीहरूले मलाई पेरुको गोन्जालोजस्तो थुन्नुपर्‍यो कि त मार्ने षडयन्त्र गरेको हो भन्ने थाहा पाएपछि प्रहरीको ब्यारिकेड तोडेर सुरक्षित स्थानमा मात्र पुगेको पनि बताएका छन् ।

प्रहरीले उनलाई पक्राउ गर्न खोजी गरिरहेको अवस्थामा उनले भनेका छन्– म भागेको छैन र म भाग्दिन पनि । पुलिस प्रशासनले मलाई खोज्नु पर्दैन । मलाई गोन्जालोज बनाएर यो आन्दोलनलाई दबाउने कोसिस गरिएको छ । म सुरक्षित मात्रै बसेको हो । म भाग्नलाई जन्मेको हैन । म झुक्नलाई जन्मेको हैन । उनले कसैलाई गोली हान्न, घरमा आगो लगाउन, निजी सम्पत्ति तोडफोड गर्न, सुरक्षाकर्मीमाथि जाइलाग्न नभनेको पनि दावी गरेका छन् ।