काठमाडौं । काठमाडौं प्रशासनले तीनकुने क्षेत्रमा जारी गरेको कर्फ्यु हटेको छ । काठमाडौं प्रशासनले शुक्रबारदेखि तीनकुने क्षेत्रमा जारी गरेको कर्फ्यु आदेश शनिबार बिहान ७ बजेदेखि हटेको हो ।

तीनकुने आसपास चारकिल्ला तोकेर जारी भएको आदेश शनिबार बिहान ७ बजेदेखि हटाइएको काठमाडौंका प्रमुख जिल्ला अधिकारी ऋषिराम तिवारीले जानकारी दिए ।

राजावादीहरूको प्रदर्शनले उग्र रूप लिएपछि प्रशासनले शुक्रबार साँझदेखि कर्फ्यु आदेश जारी गरेको थियो । तीनकुनेमा भएको झडपपछि बानेश्वर तीनकुने क्षेत्र, गौशालादेखि एयरपोर्ट, गैरीगाउँ, तीनकुने हुँदै कोटेश्वरसम्म, कोटेश्वरदेखि जडीबुटी पुलसम्म, कोटेश्वरबाट बालकुमारी पुलसम्म, बानेश्वर चोकदेखि शङ्खमूल पुलसम्म, गौशाला चोकदेखि पुरानो बानेश्वर हुँदै नयाँबानेश्वर चोकसम्म कर्फ्यु आदेश जारी भएको थियो ।

कर्फ्यु अवधिभर कर्फ्यु आदेश जारी भएको सिमानाभित्र आवतजावत गर्न, कुनै पनि प्रकारका भेला, जुलुस, प्रदर्शन, सभा, बैठक र घेराउ गर्न रोक लगाइएको थियो ।