काठमाडौँ – गैर आवासीय नेपाली संघ (एनआरएनए) को एकता महाधिवेशन सम्पन्न गर्न गठित मूल आयोजक समितिको सदस्य सचिवमा गंगाधर गौतमलाई मनोनित गरिएको छ।

एनआरएनए उच्चस्तरीय समितिको १२औं बैठकको निर्णयअनुसार बेल्जियम निवासी गौतमलाई सदस्य सचिव मनोनयन गरिएको हो।

उच्चस्तरीय समितिका अध्यक्ष तथा मूल आयोजक समितिका पनि अध्यक्ष रहेका डा शेष घलेले महाधिवेशन सफल बनाउन गौतमको पूर्ण सहयोग अपेक्षा गर्दै मूल आयोजक समितिका बैठकहरू सञ्चालन गर्न आवश्यक पहल गर्न समेत अनुरोध गरेका छन्।

एनआरएनए बेल्जियमका पूर्व अध्यक्ष समेत रहेका गौतमले संघको विधान समिति र संघमा दुइ ओटा कमिटिहरु बनेको बेला एकता गर्न वार्ता समितिमा बसेर पनि काम गरिसकेका छन्।

एकता महाधिवेशन सफल बनाउन गौतमको कार्य कुशलता सहयोगी हुने घलेले बताए।

सर्वोच्च अदालतको परमादेशद्वारा गठित उच्चस्तरीय समितिले २०८२ वैशाख २०-२२ (तदनुसार ३-५ मे, २०२५) मा काठमाडौँमा एकता महाधिवेशन र निर्वाचन सम्पन्न गरिने जनाएको छ।

संघको १०औं महाधिवेशनसम्बन्धी विवादलाई लिएर सर्वोच्च अदालतमा परेको मुद्दामा फैसला सुनाउँदै सर्वोच्चले उच्चस्तरीय समिति गठन गरी समितिको पहिलो बैठक बसेको ६ महिना भित्र एकता महाधिवेशन गर्न निर्देशन दिएको थियो।

मूल आयोजक समितिका सदस्य सचिव गौतमले विधिको शासनको सम्मान गर्दै एकता महाधिवेशन गर्नुको विकल्प नरहेको जनाए। उनले आगामी मे महिनामै काठमाडौँमा आयोजना हुने महाधिवेशनमा सबै पक्ष सहभागी हुने वातावरण बनाउन समितिले सक्दो पहल गरिरहेको पनि जनाए।

उनले कानूनको सर्वोच्चतालाई कायम गर्दै संघलाई पूर्ण लोकतान्त्रिक बनाउन निःशुल्क सदस्यता मार्फत सबै डेलिगेट्सहरुले प्रत्यक्ष मतदान प्रणाली मार्फत नया नेतृत्व चयन गरिने मे २०२५ को एकता महाधिवेशनमा सहभागी हुन सबै एनआरएनहरुलाई अनुरोध समेत गरेका छन्।