काठमाडौं । काठमाडौंमा आज हुन लागेको गणतन्त्र र राजावादीको शक्ति प्रदर्शनलाई लक्षित गरेर व्यवस्था कडा पारिएको छ। जसका लागि प्रहरी वरिष्ठ उपरीक्षक (एसएसपी)को कमाण्डमा तीन हजार पाँच सय सुरक्षाकर्मी परिचालन हुने भएको छ।

काठमाडौं उपत्यका प्रहरी कार्यालयले नियमित ड्युटीमा खटिनेबाहेक सो संख्यामा प्रहरी परिचालन गर्न लागिएको उपत्यका प्रहरी कार्यालयका प्रवक्ता शेखर खनालले बताए। उपत्यका प्रहरी कार्यालयले प्रदर्शनीमार्ग र तीनकुनेमा सादा पोसाकमा समेत ठूलो संख्यामा सुरक्षाकर्मी परिचालन गर्ने तयारी गरेको छ।

जिल्ला प्रहरी परिसर काठमाडौंका प्रमुख एसएसपी विश्व अधिकारीले सुरक्षा कमाण्डको नेतृत्व, तीनकुनेमा बानेश्वर, गौशाला वृत्तका डीएसपी, प्रदर्शनीमार्गमा जनसेवा, दरबारमार्ग र सिंहदरबार वृत्तका डीएसपी खटिनेछन्।

राजसंस्था पुनर्स्थापनाका लागि राजावादीले तीनकुने र गणतन्त्रवादीले भृकुटीमण्डपमा सभा गर्ने तय भएको छ। समाजवादी मोर्चामा आबद्ध नेकपा (माओवादी केन्द्र), नेकपा (एकीकृत समाजवादी), नेपाल समाजवादी पार्टी र विप्लव नेतृत्वको नेकपाले भृकुटीमण्डपमा प्रदर्शन गर्ने भएका हुन्।

राजसंस्था फर्काउन राजनीति गर्दै आएको राष्ट्रिय प्रजातन्त्र पार्टीले गर्ने आन्दोलनको नेतृत्व राप्रपाकै नेता दुर्गा प्रसाईंले गर्दै छन्। राजसंस्था पुनर्स्थापनाका लागि संयुक्त जनआन्दोलन समितिको कमाण्डरको जिम्मेवारी प्रसाईंलाई दिएको हो।

जनआन्दोलन समितिले बिहीबार पत्रकार सम्मेलन गर्दै संवैधानिक राजसंस्थाको पुनर्स्थापना र सँगसँगै सनातन हिन्दू अधिराज्यको पुनर्स्थापना, संघीयता खारेजी र भ्रष्टाचार नियन्त्रण र सुशासनका लागि निरन्तर आन्दोलन गर्ने जनाएको हो।

चैत १५ गते काठमाडौंमा प्रदर्शन गरेपछि चैत्र १७ गतदेखि आन्दोलनका थप कार्यक्रमलाई अघि बढाइने संयुक्त जनआन्दोलन समितिका संयोजक नवराज सुवेदीले जानकारी दिए।

समाजवादी मोर्चाले चैत १५ मा गर्न लागेको जनप्रदर्शनलाई कमजोर बनाउने काम नगर्न चेतावनी दिएको छ। नेकपा एकीकृत समाजवादीको कार्यालय आलोकनगरमा बिहीबार बसेको मोर्चाको बैठकले गणतन्त्र पक्षधरको जनप्रदर्शनलाई कमजोर बनाउन अवरोध गर्ने सोच देखिएको भन्दै जनप्रदर्शनलाई कमजोर बनाउने काम नगर्न चेतावनी दिएको हो।

बैठकपछि नेकपाका प्रवक्ता खड्गबहादुर विश्वकर्माले मोर्चाको जनप्रदर्शनलाई अवरोध गर्ने मुर्खतापूर्ण काम नगर्न बताए। उनले अग्रगमनका विरुद्ध हुने अन्य प्रदर्शन सह्य नहुने भन्दै राष्ट्रिय स्वाधीनताको पक्षमा जनप्रदर्शन गरिएकोले सहभागी हुन सबैलाई अपील गरिएको बताए।

हजारौंको संख्यामा जनप्रदर्शनमा सहभागिता हुने र कोटेश्वर, कुपण्डोल, कालिमाटीलगायतका स्थानबाट जुलुससहित भृकुटिमण्डप पुगेर सभामा परिणत हुने उनले बताए।