ग्लोबल आइएमई बैंक लिमिटेड र लुम्बिनी मेडिकल कलेज एन्ड शिक्षण अस्पतालबीच बैंकका ग्राहकलाई अस्पतालका विभिन्न स्वास्थ्य सेवामा २५ प्रतिशतसम्म छुट प्रदान गर्ने सहमति भएको छ।

उक्त सम्झौतामा बैंकका लुम्बिनी प्रदेश प्रमुख शान्ता शिवाकोटी र अस्पतालका अध्यक्ष गोपालबहादुर पोखरेलले हस्ताक्षर गर्नुभएको छ। सहमति अनुसार, बैंकका डेबिट/क्रेडिट कार्ड तथा मोबाइल एप (ग्लोबल स्मार्ट प्लस) प्रयोगकर्ताहरूलाई अस्पतालको सेवा तथा उपचार शुल्कमा २५ प्रतिशतसम्म छुट प्रदान गरिनेछ।

यस सुविधाअन्तर्गत अस्पतालका सामान्य बेड, प्रयोगशाला परीक्षण, एक्स-रे, अल्ट्रासोनोग्राफी, ओपीडी, तथा शल्यक्रियासम्बन्धी सेवाहरूमा छुट उपलब्ध हुनेछ।

अध्यक्ष पोखरेलका अनुसार, यस सहकार्यले ग्राहकहरूलाई गुणस्तरीय स्वास्थ्य सेवा सहज रूपमा उपलब्ध गराउनुका साथै अस्पतालका सेवा सुविधाहरूको विस्तारमा पनि सहयोग पुग्नेछ। यसैगरी, बैंकका लुम्बिनी प्रदेश प्रमुख शिवाकोटीले साझेदारीले ग्राहकहरूलाई प्रत्यक्ष लाभ पुग्नुका साथै बैंकको डिजिटल सेवाका प्रयोगकर्ताको संख्यामा वृद्धि हुने विश्वास व्यक्त गर्नुभयो।

ग्लोबल आइएमई बैंकले मुलुकका ७७ वटै जिल्लामा शाखा सञ्जाल विस्तार गर्दै निजी क्षेत्रको सबैभन्दा ठूलो वाणिज्य बैंकको रूपमा सेवा प्रदान गरिरहेको छ। बैंकले १,१०० भन्दा बढी सेवा केन्द्रमार्फत ५० लाखभन्दा बढी ग्राहकलाई वित्तीय सुविधा दिइरहेको छ।

त्यसैगरी, बैंकले संयुक्त राज्य अमेरिका, बेलायत, क्यानडा, अष्ट्रेलिया, मलेसिया, दक्षिण कोरिया, जापान, साउदी अरब, कतार, युएई, बहराइन, कुवेत, भारत, जोर्डन, हङकङलगायत देशहरूबाट रेमिट्यान्स भित्र्याउँदै नेपालको अर्थतन्त्रमा महत्वपूर्ण योगदान पुर्‍याउँदै आएको छ।