काठमाडौं । समाजवादको स्थापना, संविधानको रक्षा, कार्यान्वयन र विकास गर्दै विभेदरहित समाजको स्थापना गर्ने भन्दै गत वर्षको असारमा घोषणा गरिएको समाजवादी मोर्चा केही समय निदाएर फेरि जुर्मुराएको छ । उपेन्द्र यादव नेतृत्वको जसपा नेपाल बाहिरिए पनि मोर्चामा अहिले नेकपा (माओवादी केन्द्र)सहित नेकपा (एकीकृत समाजवादी), नेपाल समाजवादी पार्टी र नेपाल कम्युनिष्ट पार्टी आबद्ध छन् । पछिल्लो राजनीतिक परिस्थिति जटिल बन्दै गएको निष्कर्ष निकाल्दै मोर्चाले अग्रगमनको पक्षमा प्रदर्शन गर्ने भएको छ । केही दिनअगाडिदेखि राजावादीहरूको सक्रियता बढिरहेको र गत फागुन २५ गते काठमाडौंमा राजावादीहरूले प्रदर्शन धेरै गम्भीर भएको निष्कर्षमा पुगेको मोर्चाले राजावादीहरूको अभियानविरुद्ध प्रतिरोध गर्ने गरी कार्यक्रम तय गरेको छ ।

मोर्चाको अध्यक्षमा अहिले नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ छन् । मोर्चाले राष्ट्रिय स्वाधीनता र गणतन्त्रको रक्षा एवं समाजवादतर्फको यात्रालाई दृढतापूर्वक अघि बढाउने वातावरण बनाउन बृहत् राजनीतिक पहल लिने र राजसंस्थावादीको अभियानविरुद्ध क्रमबद्ध प्रतिरोधात्मक कार्यक्रम चलाउने निर्णय गरेको छ । पहिलो चरणमा हिजो मोर्चाले बुद्धिजीवी र नागरिक समाजसँग छलफल गरेको छ । परिस्थिति एकपछि अर्को जटिल बन्दै गएकाले यसलाई असफल बनाउन भन्दै मोर्चाले चैत १५ मा राजधानीमा विशेष शक्ति प्रदर्शन गर्ने भएकोे छ । मोर्चागत रूपमा कार्यक्रम घोषणा गरेका दलहरू दलगत रूपमा पनि बेग्लाबेग्लै कार्यक्रम तय गरेका छन् ।

नेकपा एकीकृत समाजवादीले चैत २० मा सरकारलाई ज्ञापनपत्र बुझाउने, चैत मसान्तसम्म प्रदेश र जिल्ला तहमा सार्वजनिक संवाद तथा सुझाव संकलन, वैशाख ५ मा प्रदेश सरकार र जिल्ला प्रशासन कार्यालयमा ज्ञापनपत्र पेस गर्ने, वैशाख १५ सम्म पालिका र वडा तहमा सार्वजनिक संवाद तथा सुझाव संकलन, वैशाख १९ देखि २२ सम्म पालिका र वडा कार्यालयमा ज्ञापनपत्र पेस गर्ने र वैशाख २५ मा दोस्रो चरणको कार्यक्रम सार्वजनिक गर्ने निर्णय गरेको छ