काठमाडौं । व्यापार, व्यवसाय र उद्यमशीलतामा सफलता हासिल गरी व्यावसायिक नेतृत्व र सामाजिक व्यक्तित्वका रूपमा स्थापित भएका चर्चित व्यवसायी तथा समाजसेवी एवं पूर्वमन्त्री राजेशकाजी श्रेष्ठका बारेमा ईश्वरलाल प्रतिष्ठानले पुस्तक तयार पारेको पुस्तक ‘व्यक्तित्व र योगदान’ सार्वजनिक भएको छ ।
शिशिर सापकोटा सम्पादक रहेको पुस्तकको संयोजन उज्वलजंग शाहले गरेका हुन् । प्रथम संस्करणको पुस्तकको एक हजार प्रति छापिएको छ भने प्रतिगोटा ५०० रुपैयाँ मूल्य राखिएको छ । ०५८ पृष्ठको पुस्तकमा ५ खण्डहरू रहेका छन् । पुस्तकमा राजेशकाजी श्रेष्ठको जन्मेदेखि राज्यमन्त्री हुँदासम्मको सन्दर्भ समावेश गरिएको छ ।

श्रेष्ठले चेम्बर अफ कर्मसमा बसेर गरेको योगदान, राज्यमन्त्री हुँदा गरेर कामदेखि देश विदेशमा गएर गएर गरेको कामको बारेमा पुस्तकमा चर्चा गरिएको छ । पुस्तकमा पहिलो खण्डमा श्रेष्ठको व्यक्तित्व र योगदानको बारेमा चर्चा गरिएको छ भने दोस्रो खण्डमा विश्वमा चेम्बर आफ कमर्सको उत्पत्ति र विकासक्रमको बारेमा चर्चा गरिएको छ । तेस्रो खण्डमा नेपालको चेम्बरमा श्रेष्ठको योगदानको विषयमा चर्चा गरिएको छ भने चौथो खण्डमा श्रेष्ठले नेपाल चेम्बरसँग सम्बन्धित गरेको भाषणहरूको संग्रह रहेको छ । पुस्तकको अन्तिम पाँचौँ खण्डमा भने श्रेष्ठको प्रमुख गतिविधिहरूको तस्बिरको सँगालो रहेको छ ।
नेपाल चेम्बर अफ कमर्समा विसं ०४६ देखि आबद्ध राजेशकाजी श्रेष्ठ तत्कालीन अवस्थामा युवाहरूको आकर्षणका केन्द्रविन्दुमा रहेका थिए । तत्पश्चात् दोस्रोपटक कार्य समितिमा रहँदा प्रचार–प्रसार समितिमा रही भूमिका खेलेका उनले चार दशकसम्म उद्योग वाणिज्य क्षेत्रमा योगदान गरिरहेकै छन् । उनले अन्तर–देशीय चेम्बर विस्तारबाट देशको उद्योगलाई टेवा पु¥याउन राजेशकाजी श्रेष्ठले गरेका महत्वपूर्ण कामका बारे पनि चर्चा गरेका छन् । चेम्बरकोे उचाइका लागि श्रेष्ठको योगदान, सरकार र चेम्बरबीच हुनुपर्ने सम्बन्धमा उनको भूमिकालगायतलाई यो पुस्तकमा विस्तृत खुलाइएको छ ।

बद्रीप्रसाद कोइरालाले लेखेको उक्त पुस्तकको हालै एक कार्यक्रमका बीच प्रधानमन्त्री केपी शर्मा ओलीले लोकार्पण गरेका थिए । पुस्तक विमोचन गर्दै प्रधानमन्त्री ओलीले व्यावसायिक क्षेत्रका साथै नेपाल चेम्बर अफ कमर्सको संस्थागत विकासमा योगदान दिएका व्यक्तित्व श्रेष्ठको व्यक्तित्व र कृतित्व नयाँ पुस्ताका लागि प्रेरणदायी हुने बताएका थिए ।
कार्यक्रममा पुस्तकका लेखक बद्रीप्रसाद कोइरालाले पुस्तक लेख्नुका कारण, पुस्तकमा समावेश विषयवस्तुको संक्षिप्त जानकारी र पुस्तकले आमपाठकमा पार्नसक्ने प्रभावका विषयमा बोलेका थिए । राजेशकाजी श्रेष्ठ नेपालका एक सफल व्यवसायी र समाजसेवी हुन् । २०१८ साउन १७ गते काठमाडौंको ज्याठामा जन्मिएका श्रेष्ठले पानीपोखरीस्थित भानुभक्त मेमोरियल बोर्डिङ स्कुलबाट माध्यमिक तहको अध्यनपछि पब्लिक युथ क्याम्पसबाट वाणिज्य शास्त्रमा स्नातक गरे । व्यावसायिक पृष्ठभूमि भएको परिवारमा हुर्किएका उनको जीवन व्यापार र उद्यमका क्षेत्रमा आधारित थियो । त्यतिबेलै उनका बुबाले सामान आयात गरी होलसेलको व्यापार गर्दथे । बुबाबाट सिकेको सीप र विद्यालय तथा क्याम्पसमा पढेको सैद्धान्तिक ज्ञानले श्रेष्ठलाई व्यापारमा पनि अब्बल सावित गरायो । राजेशकाजीले ०४५ सालमा चेम्बरको सदस्यता लिएका थिए । चेम्बरमा सहभागी भएपछि उनलाई व्यवसायसँगै व्यावसायिक राजनीतिमा समेत स्थापित हुने अवसर मिल्यो । चेम्बरको महासचिवका रूपमा करिब तीन वर्ष काम गरेपछि उनी चेम्बरको उपाध्यक्ष बने । ०५६ सालमा चेम्बरका अध्यक्ष भए ।

चेम्बरका अध्यक्षका रूपमा सफल कार्यकालमा नै उनी नेपाल सरकारको प्रस्तावमा उद्योग वाणिज्य तथा आपूर्ति राज्यमन्त्री बनेका थिए । आर्कस ग्रुपको अध्यक्ष उनी मन्त्रीको कार्यकालपछि पनि उनी पुनः चेम्बरमा फर्किए र आजको दिनसम्म नेपालका प्रतिष्ठित विभिन्न संस्थाहरूको अध्यक्ष र बोर्ड सदस्यका रूपमा क्रियाशील रहँदै आएका छन् । यसबाहेक अन्तर्राष्ट्रिय मञ्चमा पनि उनको सक्रिय उपस्थिति रहँदै आएको छ । उनी अन्तर्राष्ट्रिय चेम्बर अफ कमर्स नेपाल (आईसीसी)को पनि अध्यक्ष छन् । राजेशकाजी व्यावसायिक योगदानको सिलसिलामा विभिन्न पदकबाट विभूषित समेत भइसकेका छन् । प्रतिष्ठानका अध्यक्ष प्रदीपलाल श्रेष्ठको सभापतित्वमा भएको पुस्तक सार्वजनिक कार्यक्रममा चेम्बर अभियन्ताका रूपमा नेपाल महिला चेम्बरकी पूर्वअध्यक्ष तथा राष्ट्रिय सभा सदस्य अञ्जान शाक्य र नेपाल चेम्बर अफ कमर्सका पूर्वअध्यक्ष महेशकुमार अग्रवाललाई सम्मान गरिएको थियो ।