काठमाडौं । वंशाणुगत शारीरिक समस्या मार्बल बोन डिजिज अर्थात् हड्डीभित्रको मासी नबढ्ने समस्याका कारण हिँड्न सक्ने बेलादेखि नै बैसाखीको सहारामा हिँड्ने ललितपुर कुपन्डोलका अनिल महर्जनको सिर्जनशीलताका अगाडि शारिरिक दुर्बलताले हार खाएको छ । जसका कारण उनी विभिन्न कारणले अपांगता भएका व्यक्तिहरूका लागि एक उदाहरणीय र प्रेरक पात्र हुन् । मार्बल बोन डिजिज एक दुर्लभ आनुवंशिक समस्या हो । जसले हड्डीको विकासलाई प्रभावित गर्दछ । हड्डीको पुनर्निर्माणमा बाधा पु¥याउँछ । परिणामस्वरूप हड्डी असामान्य रूपमा कठोर, तर अत्यन्त भंगुर बनाउँछ र जतिबेला पनि भाँचिने सम्भावना अत्यधिक हुन्छ ।

अनिल कम्युटरको किबोर्ड माउस र मोनिटरसँग अभ्यस्त छन् र नयाँनयाँ म्युजिक भिडियो, वृत्तचित्र, र चलचित्रको सम्पादन गर्ने सिर्जनशील कर्ममा झन्डै डेढ दशक बिताइसकेका छन् । कम्युटरको ज्ञान भएका महर्जनले सम्पादन कला आफैँ सिकेका हुन् ।
जेनिक्स मिडिया नामक कम्पनीका सञ्चालक महर्जनले डेढ दशकको यो समयमा चार सयभन्दा बढी नेपाली भाषाका म्युजिक भिडियो, सयभन्दा बढी सर्ट मुभी, ६० भन्दा बढी वृत्तचित्र डकुमेन्ट्रीसहित थुप्रै अन्य भाषाका भिडियो र सर्ट मुभीको सम्पादन गरिसकेका छन् । त्यसैगरी उनले हालसम्म प्रदर्शनमा आइसकेका आधा दर्जनभन्दा बढी नेपाली ठूलो पर्दाका चलचित्रहरूको सम्पादन गरिसकेका छन् । उनले सम्पादन गरेका चलचित्रहरूमा तिम्रो मन बदलिएछ, कसैलाई नभन्नु, मट्टिमाला, झमक बहादुर, ब्ल्याक ब्युटी, र फूर्वा प्रदर्शन भइसकेका छन् भने अहिले उनी चैत ८ गते प्रदर्शनमा आउने चलचित्र द्रौपदीको सम्पादनको अन्तिम चरणमा छन् ।

चलचित्र द्रौपदी नौलो र मौलिक नेपालीपनको चलचित्र बनेको महर्जनले बताए । सम्पादनका क्रममा निर्देशकसँग छलफल गर्दै सम्पादनमा उत्कृष्ट दिने प्रयास आफूले गरेको उनले बताए । चलचित्रका पात्रहरूले पनि जीवन्त अभिनय गरेको उनले जानकारी दिएका छन् । चलचित्रका पात्रहरूले निर्वाह गरेको चरित्रहरू अरू चलचित्रका भन्दा केही भिन्न पाएको महर्जनले बताए । आश्विनी शाही, रवि ओड, कविराज भाम, जेएलसन अधिकारी, सुजाता तिमल्सिना, विष्णु ठडराई, प्रकाश ज्ञवाली, सीता बौडेल, सुरज अधिकारी र निर्देशक क्रषिराज आचार्यलगायत सबैले चरित्रमा न्याय गरेको उनको भनाइ छ । चलचित्रका पात्रहरूमा जेएलसन अधिकारीले निर्वाह गरेको चरित्र सम्पादक र दर्शकको आँखाले हेर्दा नोटिसेबल भएको पनि उनले बताए ।

कुपन्डोलमा ४६ वर्षअघि जन्मिएका महर्जन घरको जेठो सन्तान हुन् । तीनजना दाजुभाइमध्ये दुई दाजुभाइनै मार्बल बोन डिजिज सर्भाइभर हुन् । सानैदेखि केही गरौँ र नाम राखौँ भन्ने सोच बोकेका अनिल आफ्ना बाबु आमालाई प्रेरणाको स्रोत मान्छन् । हिँडडुल गर्न केही समस्या भए पनि सम्पादनमा कुनै समस्या नभएकाले आफूलाई अन्य सामान्य मानिसझैँ महसुस हुने महर्जनले बताए । उनी आफूलाई बिचराको पात्र नठानीदिन र काम हेरेर मूल्यांकन गरिदिन आग्रह गर्दछन् । उनले सगरमाथा म्युजिक अवार्ड, स्टार म्युजिक अवार्डलगायत विभिन्न अवार्डमा सर्वोत्कृष्ट सम्पादकको अवार्ड पाएका छन् ।