काठमाडौँ । ‘रील्स इन्टरटेन्मेन्ट’ को प्रस्तुति ‘सिङ्गिङ स्टार नेपाल सिजन १’ शनिवारबाट प्रसारणमा आउने भएको छ । हिजो देखि प्रसारणको तयारी भए पनि अर्को साताबाट शनिवार र आइतबार राति ९ बजे बुढासुब्बा डिजिटल युट्युब च्यानल र प्राइम टाइम्स एचडी टिभी बाट हेर्न सकिन्छ ।

यो मौलिक नेपाली गायन रियालिटी शो को प्रोजेक्ट हेड र निर्देशक प्रमोद कुमार भण्डारी हुन् भने निर्माता टोलीमा शिखर गौतम, बुद्धि प्रसाद ढुङ्गाना, र नवराज चौलागाईं छन् । यस सिजनका जजहरूमा डा. त्रिशला गुरुङ, अर्जुन पोखरेल, र सनुप पौडेल रहेका छन् । कार्यक्रमको सञ्चालकमा नम्रता श्रेष्ठ र विशाल पोखरेल छन् ।

‘सिङ्गिङ स्टार नेपाल’ को उद्देश्य नेपाली संगीतप्रेमी दर्शकलाई मनोरञ्जन मात्र होइन, नेपाली सङ्गीत क्षेत्रका लागि नयाँ प्रतिभाशाली गायक÷गायिका खोज्ने रहेको आयोजकले जनाएको छ । निर्देशक भण्डारीका अनुसार यो शो ले नेपाली सङ्गीतको मौलिकता झल्काउने छ र दर्शकलाई भरपुर मनोरञ्जन दिनेछ । कार्यक्रमको बजार व्यवस्थापन तपस्या क्रिएसन ले गरेको छ ।