काठमाडौं । नेपाली कांग्रेसनिकट सांस्कृतिककर्मी तथा सात हजारभन्दा बढी म्युजिक भिडियोमा निर्देशन र कोरियोग्राफी गरेका चर्चित निर्देशक प्रकाश भट्टले बलिउडको फिल्मी नगरी भनेर प्रसिद्धि कमाएको मुम्बई सहरमा बलिउडका कलाकारसँग सहकार्य गर्दै छन् ।

नेपालका नयाँ पुराना प्रायः सबैजसो संगीतकर्मीका गीतमा नेपालका अधिकांश कलाकारसँग म्युजिक भिडियोमा सहकार्य गरेका निर्देशक भट्ट यतिवेला भारतका चर्चित कलाकार र प्राविधिकसँग सहकार्य गर्नका लागि मुम्बई पुगेका छन् । मुम्बईमा मशकविन स्टुडियोका लागि ‘मेरी घरवाली’ गीतको म्युजिक भिडियोको निर्माण पनि भइरहेको छ । कलाकारिता क्षेत्रमा लागेको २५ वर्षको अनुभवलाई लिएर बलिउडमा सहकार्य गर्न पाएकोमा आगामी दिनमा काम गर्न अझै सहज हुने निर्देशक भट्टले सुनाए ।

साइभिजन प्रालिका सञ्चालकसमेत रहेका भट्टले बलिउडका स्थापित कलाकार अभिनयकी महारानी हिमानी शिवपुरी, करण शर्मा, श्वेता महरा जस्ता कलाकारसँग निर्देशक सहकार्य गरेका छन् । चर्चित अभिनेता साहरूख खानसँग काम गरिरहेका कलाकारको साथमा सहकार्य गर्न पाउँदा उनी खुसी छन् । उनीहरूको सहकार्यले गर्दा नयाँ अनुभव र ऊर्जा मिलेको भट्टले बताए ।