काठमाडौं । सुदूरपश्चिममा पर्ने प्राकृतिक तथा आध्यात्मिक ठाउँ खप्तड क्षेत्रमा छायांकन गरिएको गीत सार्वजनिक भएको छ। एभरेष्ट ग्यालरीको आयोजनामा नेपाली कांग्रेसका महामन्त्री गगनकुमार थापा र पूर्व पर्यटन मन्त्री प्रेम आले , राष्ट्रिय सभा सदस्य महेश महरा, सुदुरपश्चिम प्रदेश सभा सदस्यद्वय पदम शाही र शिव सिंह वली लगायत सुदुर पश्चिम प्रेदेशका विभिन्न क्षेत्रका विशिस्ट व्यक्तित्वहरुको उपस्तिथिमा सार्वजनिक गरिएको हो ।
कार्यक्रममा दिपक शर्मा , विशाल निरौला , डा. शिव सुबेदीका शब्द संगीतमा रहेका खप्तड क्षेत्रमा छायांकन गरिएका ३ वटा म्युजिक भिडियोहरु सार्वजनिक गरिएको थियो । ती मध्य डेभिड शंकर र वेनिशा पौडेलको स्वर र दिपक शर्माको शब्द संगीत रहेको सधै यस्तै मिठा कुरा बोलको गीतको म्युजिक भिडियोमा पर्यटकीय क्षेत्र खप्तडलाई प्रस्तुत गरिएको छ । सुटिङका लागि समेत उपयुक्त ठाउँका रुपमा प्रस्तुत गर्न खोजिएको म्युजिक भिडियो निर्माण संयोजन समेत गरेका कलाकार सनम कठायतले जानकारी दिएका छन्।
विगत एक दशक देखी म्यूजिक भिडियोमा सकृय मोडल कठायतले ,पर्यटन प्रवर्द्धनका लागि अभियानका रुपमा यसपटक खप्तडमा केही गीत सुटिङ गरिएको बताए। अभियानमा बझाङको खप्तड छान्ना गाउँपालिका, कार्की क्रियसनलगायतले सघाएका छन्। भिडियोमा कठायतसँगै निशा कार्कीको अभिनय देख्न सकिन्छ । भिडियोको निर्देशन सञ्चारकर्मी समेत रहेका डिबी खड्काले गरेका हुन् । क्रियटिभ निर्देशन जनक सिंहको रहेको भिडियोलाई दिपक गिरीले खिचेका हुन भने सम्पादन विकास दाहालले गरेका हुन्। भिडियो कार्की क्रियसन मार्फत सार्वजनिक गरिएको छ।