काठमाडौँ – नेपाल कम्युनिस्ट पार्टी (माओवादी केन्द्र)को आज बस्ने भनिएको स्थायी समितिको बैठक मंगलबारका लागि सरेको छ ।

सरकारले संसदको जारी हिउदे अधिवेशन अन्त्यको सिफारिस गरेपछि माओवादी केन्द्रले स्थायी कमिटीको बैठक एक दिनपछि सारेको हो ।  पार्टी केन्द्रीय कार्यालय पेरिसडाँडामा दिउँसो १ बजेका लागि बोलाएको बैठकमा समसामयिक राजनीतिक विषय र पार्टीको आगामी योजनाबारे छलफल गर्न बैठक बोलाइएको थियो ।

बैठकले केपी शर्मा ओली नेतृत्वको सरकारलाई दिएको समर्थन फिर्ता लिन सक्ने माओवादी केन्द्रका नेताहरुले बताएका थिए । काँग्रेसले माओवादी केन्द्रले अझै सरकारलाई दिएको समर्थन फिर्ता नलिएको भन्दै सरकार गठनमा अग्रसरता नदेखाए पनि माओवादी केन्द्रले भने अझै निर्णय गरेर अगाडी बढ्न सकेको छैन ।