काठमाडौं – सहिद स्मारक बी डिभिजन लिग फागुनको दोस्रो साता सुरु हुने भएको छ । अखिल नेपाल फुटबल संघ (एन्फा)ले कोरोनाबाट प्रभावित बनेको गत वर्षको स्थगित बी डिभिजन लिग फागुन ११ गतेबाट सुरु हुने भएको हो । कोरोनाका कारण बी डिभिजन लिग गत वर्ष चैत ५ गतेबाट स्थगित छ ।

एन्फाले यस वर्ष ए डिभिजन लिग सञ्चालन गर्न नसकिने निष्कर्श सहित गत वर्ष स्थगित रहेको प्रतियोगिता पुरा गर्ने लक्ष्य लिएको छ । बी डिभिजन लिग सञ्चालनका सन्दर्भमा एन्फाले बुधबार क्लबका प्रतिनिधिसंग छलफल गरेको छ । क्लबका प्रतिनिधिले लिगमा भाग लिन आर्थिक समस्या पर्ने भन्दै स्वास्थ्यको मापदण्ड पुरा गर्न समेत नसकिने बताएका थिए ।