इंग्लिस क्लब म्यानचेस्टर युनाइटेड युईएफए युरोपा लिगको सेमिफाइनलबाट बाहिरिएको छ ।

गएराति भएको खेलमा स्पेनिस क्लब सेभिल्लासँगै २–१ गोल अन्तरले पराजित हुँदै युनाईटेड प्रतियोगितबाट बाहिर गएको हो । युनाइटेडलाई पराजित गरेको सेभिल्लाले फाइनलमा स्थान सुरक्षित गर्‍यो ।

युनाईटेडले शुरुआती अग्रता जोगाउन नसक्दा फाइनल पुग्न असफल भएको हो । नवौं मिनेटमा ब्रुनो फर्नान्डेसको पेनाल्टीमा गोल गर्दै युनाईटेडलाई अग्रता दिलाएका थिए । सुसोले २६ औं मिनेटमा गोल गरेपछि सेभिल्ला खेलमा फर्किएको थियो । पहिलो हाफ एक एक गोलको बराबरीमा सकिएको थियो भने सेभिल्लाले निर्णायक गोल दोस्रो हाफमा गरेको थियो ।

७८ औं मिनेटमा सेभिल्लाले वैकल्पिक खेलाडी लुक डे जोङको गोलमा फेरी अग्रता लियो । सोही अग्रता नै अन्तिमसम्म जोगाउँदै सेभिल्लाले फाइनलमा स्थान सुरक्षित गरेको हो ।

सेभिल्लाले युरोपा लिगको उपाधिका लागि इन्टर मिलान र शाख्तर डोनेस्कको विजेतासँग खेल्ने छ ।