काठमाण्डौ । प्रधानमन्त्री केपी शर्मा ओली सिंगापुरबाट स्वास्थ्योपचार गरी आज अपराह्न आइपुग्ने भएका छन् । उहाँ सिंगापुरबाट थाइल्यान्ड हुँदै अपराह्न थाई एयरवेजबाट स्वदेश फर्किदै  छन्।

प्रधानमन्त्री ओली भदौ ५ मा मृगौलासम्बन्धी एन्टिबडीको उपचार गर्न सिंगापुर प्रस्थान गरेका थिए । प्रधानमन्त्रीका प्रेस सल्लाहाकार डा. कुन्दन अर्यालका अनुसार उनको सिंगापुरस्थित नेसनल युनिभर्सिटी अस्पतालमा उपचार भएको हो ।

उपचारकै क्रममा प्रधानमन्त्रीले दुईपटक टेलिप्रिजेन्समार्फत मन्त्रिपरिषद्का सदस्यहरूसँग सरकारका कामबारे छलफल गरेका थिए ।

स्वास्थ्य स्थिति बुझ्न सिंगापुर गएका सत्तारूढ नेकपाका नेताद्वय वामदेव गौतम र विष्णुप्रसाद पौडल समेत प्रधानमन्त्रीसँगै फर्किदै छन् । प्रधानमन्त्रीका साथमा उहाँकी पत्नी राधिका शाक्य र स्वकीय सचिव राजेश ब्रजाचार्यलगायत हुनुहुन्छ ।