काठमाडौं– फ्लोरिकल्चर एशोसिएशन नेपाल फ्यान ले ‘स्वच्छ वातावरण तथा आर्थिक सम्बृद्धिको लागि पुष्प व्यवसाय’ २२ औं फ्लोरा एक्स्पो पुष्प मेला २०७५ आयोजना गर्ने भएको छ ।
भकृटीमण्डपमा चैत ८ गतेदेखि १० गतेसम्म आयोजना हुने सो एक्स्पोबाट ६० लाख रुपियाँ बराबराको व्यवसायी गर्ने योजना रहेको फ्यानका अध्यक्ष कुमार कसजु श्रेष्ठले बताए ।

एक्स्पोमा जम्मा ८४ वटा स्टल रहनेछन्, जसमा अफिसियल स्टलका लागि १०, प्रतियोगितात्मक प्रदर्शनीका लागि ४, ल्याण्डस्केपिङ्गका लागि ४, व्यवसायिक स्टलका लागि ६५ वटा स्टल राख्ने अध्यक्ष श्रेष्ठले जानकारी दिए ।

मेलामा सहभागी भएका विभिन्न पुष्प व्यवसायीहरुद्वारा उत्पादित फूल बिरुवाहरुबीच स्वच्छ प्रतिस्पर्धा गराई विभिन्न विधामा प्रथम हुने पुष्प व्यवसायीलाई नगद १० हजार र पाँच हजारसहित सिल्ड तथा प्रमाणपत्रद्वारा पुरस्कृत गरिने समेत जानकारी गराए । फ्यानले आयोजना गरेको पत्रकार सम्मेलनमा अध्यक्ष श्रेष्ठले लामो समयदेखि निरन्तर रुपमा पुष्प व्यवसाय सञ्चालन गरिरहेको पुष्प व्यवसायीहरु मध्येबाट वरियातको आधारमा १ जना छनौट गरी सो नर्सरीलाई कदरपत्रद्वारा सम्मान समेत बताए ।