स्पेनिस ला लिगा फुटबलमा बार्सिलोना विजयी भएको छ ।

लगातार दुई खेलमा बराबरी खेलेको बार्सिलोनाले आइतबार राति भएको खेलमा लेभान्टेमाथि ३–० को फराकिलो जित दर्ता गर्दै तालिकको छैटौं स्थानमा उक्लिएको छ ।

उसको १२ अंक भएको छ । घरेलु मैदान क्याम्प नोउमा मेफिस डिपाएले पेनाल्टीमा गोल गर्दै सातौं मिनेटमा बार्सिलोनलाई अग्रता दिलाएका थिए ।

१४ औं मिनेटमा लुक डी जोङले अग्रता दोब्बर बनाएका थिए । दोस्रो हाफको अतिरिक्त समयमा अन्सु फातीले गोल गरेपछि बार्सिलोना सहज जित निकाल्न सफल भयो ।

पराजित भएको लेभान्टे ७ खेलबाट ४ अंक जोड्दै तालिकाको १७ औं स्थानमा रहेको छ ।

ला लिगा अन्तर्गत नै रियल बेटिसले गेटाफेमाथि २–० को जित दर्ता गरेको छ ।

बेटिसका लागि दुवै गोल विलियम जोसेले गरेका थिए । बेटिस १२ अंकसहित सातौं स्थानमा छ भने गेटाफे पुछारमा रहेको छ ।

रायो भाल्कानोले कार्डिजमाथि ३–१ गोलको जित दर्ता गर्दा रियल सोसिडाडले एल्चमाथि १–० को जित दर्ता गरेको छ ।