गोरखा – गोरखाको पालुङटार नगरपालिका– ९ बिर्दीबजार नजिकै भएको ट्र्याक्टर दुर्घटना हुँदा एक युवकको मृत्यु भइएको छ ।

धादिङको दार्खा घर भएका २० वर्षका याकुब तामाङको ज्यान गएको डीएसपी प्रकाश दाहालले जानकारी दिए ।

ग १ त ४२७८ नम्बरको ट्र्याक्टर गएराति पौने १० बजेतिर सडकबाट १० मिटर तल खस्दा उनको घटनास्थलमै मृत्यु भएको उनले जानकारी दिए।

खोप्लाङको मसानेठाँटीबाट बिर्दीतर्फ गइरहेको खाली ट्र्याक्टर दुर्घटना भएको हो ।

मृतकको शव घटनास्थलमै राखिएको बताइएको छ । उनका आफन्त धादिङबाट घटनास्थलमा आइपुगेका छन् । ट्र्याक्टर धनीसँग घटनास्थलमै कुरा गरेपछि मात्रै शव उठाउने अडान लिएका छन् । ट्र्याक्टर र चालक प्रहरी नियन्त्रणमा रहेको डीएसपी दाहालले जानकारी दिए ।