बारा – बाराको कलैयामा दुई जना बालकको घाँटी रेटेर हत्या गरिएको छ । जिल्लाको कलैया उपमहानगरपालिका वडा नम्बर ७ रंगपुर निवासी दुई जना बालकको घाँटी रेटिएको अवस्थामा शव फेला परेको हो ।

सोही वडा निवासी अब्दुल गफार अन्सारीका दुई जना छोरा करिब ५ वर्षीय छोरा अमन अन्सारी र करिब  ८ वर्षीय उस्मान अन्सारीको घाँटी रेटेर हत्या गरिएको जिल्ला प्रहरी कार्यालय बाराले जनाइएको छ । घटना बारे थाहा पाउनासाथ जिल्ला प्रहरी कार्यालयबाट प्रहरी नायब उपरीक्षक गौतम मिश्राको टोली घटना स्थल पुगेको छ । स्थानीयहरुका अनुसार ती बालकहरुको शव मंगलवार बिहान मदर्शा टोलमा भेटिएको हो ।

सोमवार साँझ खेल्न भनेर घरबाट निस्किएका दुई बालक हिजो देखि नै सम्पर्क बिहिन भएका थिए । बारा प्रहरीले दुबै जना बालकको शव पोस्टमार्टमको लागि जिल्ला अस्पतालमा पठाएको छ, भने घटना बारे थप अनुसन्धान भइरहेको प्रहरी नायब उपरीक्षक मिश्राले बताएका छन् ।