काठमाडौँ –पार्टीभित्र देखा परेका समस्या समाधान गर्न जनता समाजवादी पार्टी जसपाका दुई अध्यक्षबीच छलफल भइरहेको छ।

बालकुमारीस्थित पार्टी कार्यालयमा अध्यक्ष महन्थ ठाकुर र अर्का अध्यक्ष उपेन्द्र यादवबीच छलफल भइरहेको जसपाका केन्द्रीय कार्यकारिणी समिति सदस्य केशव झाले बताए ।

उनका अनुसार आन्तरिक रुपमा पार्टीमा देखा परेका समस्या समाधान गर्ने प्रयासस्वरुप छलफल भएको हो।

प्रधानमन्त्री केपी शर्मा ओलीलाई विश्वासको मत दिने÷नदिनेबारे ठाकुर र यादव पक्ष विभाजित भएका थिए।

ठाकुरपक्षका १५ सांसद तटस्थ बसे पनि यादव पक्षका १५ जनाले भने विपक्षमा मतदान गरेपछि जसपा विभाजनको संघारमा पुगेको विश्लेषण भइरहेको छ।

ठाकुरपक्षका बहुमत सांसदहरुले महतोलाई संसदीय दलको नेता चयन गरेको समाचार सार्वजनिक भएपछि यादवपक्षले त्यसलाई अस्वीकार गरेको छ।

ठाकुरनिकट नेता झाका अनुसार आजको बैठकमा कुरा नमिले जसपा औपचारिक रुपमा विभाजनतिर जानेछ।

‘पार्टीभित्र देखा परेका समस्या समाधान हुने दिशातिर गयो भने जसपा एकताबद्ध हुनेछ’, झाले नेपालखबरसँग भने, ‘यदि समाधान नभए पार्टीको बहुमत सदस्यले यादवलाई कारबाही गरेर जानेछ।’

उता यादवनिकट नेताहरुका अनुसार ठाकुरसँग अन्तिम कुराकानी गरेर पार्टीलाई एकताबद्ध बनाउने प्रयास भएको हो।

यदि कुरा नमिले यादव पक्षले पनि ठाकुर–महतोलाई कारबाही गरेर जाने तयारी गरेको छ।

जसपाको हरेक निर्णय गर्ने अधिकार केन्द्रीय कार्यकारिणी समितिमा छ। सो समितिमा आआफ्नो बहुमत रहेको ठाकुर र यादवले दाबी गर्दै आएका छन ।