नेपाल, बंगलादेश र किर्गिस्तानबीचको त्रिदेशीय अन्तर्राष्ट्रिय फुटबल प्रतियोगिता आजबाट सुरु हुँदैछ ।

काठमाडौंको दशरथ रङ्गशालामा हुने प्रतियोगिताको उद्घाटन खेलमा बंगलादेश र किर्गिस्तान भिड्ने छन् ।

नेपालले किर्गिस्तानसँग चैत १२ गते खेल्ने छ । त्यस्तै नेपालले बंगलादेशसँग चैत १४ गते शनिबार खेल्ने तालिका तय भएको छ ।

राउण्ड रोबिन लिगको आधारमा शीर्ष दुई टिमले फाइनलमा चैत १६ गते सोमबार उपाधिका लागि खेल्नेछन् ।

उपाधि विजेताले पाँच हजार अमेरिकी डलर प्राप्त गर्नेछ । प्रतियोगिता अघि हिजो भएको पत्रकार सम्मलनमा तीनै देशका खेलाडी तथा कप्तानहरुले उपाधि जित्ने दावी गरेका छन् ।

नेपाली राष्ट्रिय फुटबल टिमका मुख्य प्रशिक्षक बालगोपाल महर्जनले उत्कृष्ट प्रदर्शनका लागि प्रयास गर्ने बताउनुभयो ।

उहाँले घरेलु मैदानमा हुने प्रतियोगिताले आफूहरुलाई फाइदा पुग्ने पनि बताउनु भएको छ ।

उपकप्तान रोहित चन्दले घरेलु मैदानमा अन्तर्राष्ट्रिय प्रतियोगिता खेल्न पाउँदा खुशी लागेको बताउनुभयो ।

नेपाली टिमको कप्तानी भने किरण चेम्चोङले गर्ने भएका छन् ।