इंग्लिस प्रिमियर लिग फुटबलमा चेल्सी विजयी भएको छ ।

सोमबार राति भएको खेलमा चेल्सीले एभर्टनलाई २–० गोल अन्तरले पराजित गरेको हो ।

चेल्सी जितसँगै तालिकामा ५० अंक बनाएको छ भने तालिकाको चौथो स्थानमा रहेको छ ।

पराजित भएको एभर्टन ४६ अंकका साथ छैटौं स्थानमा रहेको छ ।

चेल्सीलाई घरेलु मैदानमा जित दिलाउनका लागि बेन गडफ्रेले आत्मघाति गोल उपहार दिएका थिए ।

३१ औं मिनेटमा एर्भटनका गडफ्रेले आफ्नै पोस्टमा गोल गरेपछि विपक्षी चेल्सीले अग्रता लिने मौका पाएको थियो ।

पहिलो हाफमा एक गोलको अग्रता लिएको चेल्सीले दोस्रो हाफमा एक गोल थपेको थियो ।

त्यो पनि पेनाल्टी मार्फत । जर्जिन्होले पेनाल्टी माफर्त ६५ औं मिनेटमा गोल गरेपछि चेल्सी २–० गोल अन्तरले अघि बढ्यो ।

त्यसपछि दुवै टिमबाट थप गोल नभएपछि चेल्सी २–० गोल अन्तरले विजयी हुन पुग्यो ।

प्रिमियर लिग तालिकामा म्यानचेस्टर सिटी ६५ अंकका साथ शीर्ष स्थानमा रहँदा दोस्रो स्थानमा रहेको म्यानचेस्टर युनाइटेड ५४ अंकसहित दोस्रो स्थानमा छ ।

गत संस्करणमा उपाधि जितेको लिभरपुल भने ४३ अंकका साथ आठौं स्थानमा छ ।