काठमाडौ . रजनी थोकरको निर्णायक गोलमा चन्द्रपुर नगरपालिका रौतहटले राष्ट्रिय महिला लिगमा विराटनगर नगरपालिका मोरङलाई पराजित गरेको छ।

ललितपुरको सातदोबाटोस्थित एन्फा कम्प्लेक्सको मैदानमा आइतबार भएको खेलमा चन्द्रपुरले विराटनगरलाई १–० को झिनो अन्तरले हराँउदै लिगमा दोस्रो जित दर्ता गरेको हो।

पहिलो हाफ गोलरहित बराबरीमा सकिएको खेलमा दोस्रो हाफमा मात्रै गोल सम्भव भएको हो। खेलको ७० औं मिनेटमा रजनीले निर्णायक गोल गरिन्।

चन्द्रपुरले पहिलो लेगमा भन्दा सुधारिएको प्रर्दशन गरेको थियो। पहिलो लेगमा विराटनगरले चन्द्रपुरलाई ५–० को फराकिलो अन्तरले हराएको थियो। जितसँगै चन्द्रपुरले अंकतालिकामा ३ अंक जोडेको छ। ६ अंक जोडेको चन्द्रपुर तालिकाको छैटौं स्थानमा यथावत छ। हारपछि १० अंक भएको विराटनगर तेस्रो स्थानमा यथावत छ।

आजै हुने दोस्रो खेलमा विभागीय टोली नेपाल पुलिस क्लब र वालिङ नगरपालिका स्याङ्जा खेल्नेछन्। खेल सोही मैदानमा दिउँसो ३ बजे सुरु हुनेछ।