इंग्लिस प्रिमियर लिग फुटबलमा एर्भटन विजयी भएको छ ।

शनिबार राति भएको खेलमा एभर्टनले रेलिगेशन जोनमा संघर्षगरिरहेको शेफिल्ड युनाइटेडमाथि १–० गोल अन्तरको जित दर्ता गरेको हो ।

शेफिल्डलाई पराजित गर्दै स्पष्ट तीन अंक जोडेको एभर्टन अंक तालिकाको दोस्रो स्थानमा उक्लिएको छ । लिगको १५ खेलबाट जम्मा २ अंक जोडेको शेफिल्डमाथि ८० औं मिनेटमा जिल्फी सिगर्डसनले गोल गरेका थिए । उक्त गोल नै निर्णायक बन्न पुग्यो ।

एभर्टनको अंक तालिकामा २९ अंक छ भने एक खेल कम खेलेको लिभरपुल ३१ अंकसहित शीर्ष स्थानमा छ । शनिबार नै भएका अन्य खेलमा म्यानचेस्टर युनाइटेड र लेस्टरसिटी २–२ गोलको बराबरीमा रोकिँदा म्यानचेस्टर सिटीले न्युकाशल युनाइटेडलाई २–० गोलले पराजित गरेको छ ।

सिटीका लागि १४ औं मिनेटमा गुन्डोगान र ५५ औं मिनेटमा फरान टोरेसले गोल गरेका थिए ।
यस्तै, फुलह्याम र साउथह्याम्प्टनले गोलरहित बराबरी खेले भने एस्टोन भिल्लाले क्रिष्टल प्यालेसलाई ३–० ले पराजित गरेको थियो ।