काठमाडौं । नेपालका प्रथम अर्थ सचिव एवं प्रथम गभर्नर हिमालय शमशेर जंगबहादुर राणालाई पत्नी शोक परेको छ । राणाकी श्रीमती विजया लक्ष्मी राणाको गत आइतबार ८३ वर्षको उमेरमा निधन भएको हो ।

लामो समयदेखि अर्बुद्ध रोगबाट पीडित राणाको थापाथलीस्थित निवासमा निधन भएको पारिवारिक स्रोतले जानकारी दियो । नेपालका चर्चित जमिन्दार खड्ग बहादुर मल्लकी छोरी राणाको जन्म वि.सं. १९९३ चैत १२ गते भएको थियो ।

राणाका दुई छोरा अशोक राणा र अमर राणा छन् भने छोरीहरु प्रतिभा पाण्डे र संगीता थापा हुन् । राणाका जेष्ठ सुपुत्र अशोक राणा हिमालयन बैंक लिमिटेडका कार्यकारी अधिकृत हुन् । यसैगरी जेष्ठ सुपुत्री प्रतिभा पाण्डे प्रतिष्ठित ब्याकंर पृथ्वीवहादुर पाण्डेकी श्रीमती हुन् भने अर्की छोरी संगीता थापा नेपालकी प्रसिद्ध चित्रकार हुन् । उनी पूर्व प्रधानमन्त्री स्व. सूर्यवहादुर थापाकी बुहारी तथा पूर्व मन्त्री सुनिल थापाकी श्रीमती हुन् ।