गत फागुनमा राष्ट्रियसभाकै दीगो विकास तथा सुशासन समितिले पनि ग्यालरी बैठकको निरीक्षण गरेको थियो। छड्के अनुगमनको क्रममा ग्यालरी बैठक र भुइँतल्लामा थन्क्याइएका फर्निचरका सामग्री र इलेक्ट्रिक सामानहरूले भरिभराउ र लथालिंग अवस्थामा भेटिएको समिति सदस्य दीनानाथ शर्माले बताए।

संसद् सचिवालयभित्र यस्तो भेटेपछि समितिले तीन महिनाभित्र गरिसक्न सचिवालयलाई निर्देशन दिएको छ। तर संसद् सचिवालयले हालसम्म यसको व्यवस्थापन गरेको छैन।

संसद् सचिवालयले नै संसदीय समितिको निर्देशन कार्यान्वयन नगरेको सांसद शर्माको आरोप छ। ‘हामीले संसद्का महासचिवलाई नै बोलाएर व्यवस्थापन गर्न निर्देशन दिएका थियौँ। महासचिवले तत्काल गर्ने प्रतिबद्धता पनि गर्नु भएको थियो’, उनले भने, ‘तर अहिलेसम्म कार्यान्वयन भएन। समितिको निर्देशन कार्यान्वयनमा संसद् सचिवालय नै उदासीन देखियो।’