काठमाडौँ । कप्तान पारस खड्काले एकदिवसीय अन्तर्रा्ष्ट्रियमा पहिलो शतक प्रहार गरेपछि तेस्रो तथा निर्णायक खेलमा यूएईलाई ४ विकेटले हराउँदै नेपालले एकदिवसीय शृङ्खलामा पहिलो जित हासिल गरेको छ ।

घरेलु टोली यूएईले दिएको २ सय ५५ रनको लक्ष्य नेपालले ४४.४ ओभरमा ६ विकेटको क्षतिमा पूरा र्गयो। तीन खेलको शृङ्खला अन्तर्गत शुक्रबार भएको पहिलो खेलमा ३ विकेटले पराजित भएको नेपालले शनिबार भएको दोस्रो खेलमा १ सय ४५ रनको विजय हासिल गरेको थियो ।

गत वर्षको मार्चमा जिम्बाबेमा भएको विश्वकप छनोट मार्फत् एकदिवसीय अन्तर्रा्ष्ट्रिय मान्यता पाएको नेपालले त्यसपछि नेदरल्याण्ड्ससँग दुई एकदिवशीय खेलको शृङ्खला खेलेको थियो। जुन १—१ को बराबरीमा सकिएको थियो।

ओपनर बिनोद भण्डारी ९ रनमा आउट भएपछि तेस्रो नम्बरमा ब्याटिङमा आएका कप्तान पारसले ९६ बलमा शतक पूरा गरेका हुन्। उनले दोस्रो विकेटका लागि उपकप्तान ज्ञानेन्द्र मल्लसँग मिलेर ६२ रनको साझेदारी गरेका थिए।

उनी एकदिवशीय अन्तर्रा्ष्ट्रियमा पहिलो शतक प्रहार गर्ने नेपाली खेलाडी समेत बनेका छन्। पारसले १०९ बलमा १५ चौका र १ छक्काको सहयोगमा १ सय १५ रन बनाएर आउट भए।

नेपालका लागि उपकप्तान मल्लले ३५ बलमा ३१, सन्दीप जोराले २० बलमा १९ र रोहितकुमार पौडेलले २४ बलमा १६ रन बनाए। आरिफ शेख २१ र सोमपाल कामी २६ रनमा अविजित रहँदै टिमलाई ऐतिहासिक जित दिलाए।

यसअघि दुबईस्थित आईसीसी एकेडेमी ओभलमा टस हारेर पहिले ब्याटिङ गरेको युएईले निर्धा्रित ओभरमा ६ विकेट गुमाएर २ सय ५४ रन बनाएको थियो।

कमजोर सुरुआत गरेको युएईका मध्यक्रमका ब्याट्सम्यानले इनिङ उकासेका थिए। युएईले सुरुआती पावर प्लेको १० ओभरमा मात्र १४ रन बनाउँदा महत्वपूर्ण दुई विकेट गुमाएको थियो। उसका ओपनरहरु अस्फाक अहमदलाई सोमपाल कामी र चिराग सुरीलाई करण केसीले खाता खोल्नै दिएनन्।

घुलाम सब्बरले १८ र मुहम्मद उस्मानले २६ रन बनाएर आउट हुँदा युएईले २०.२ ओभरमा ४७ रन जोडेर ४ विकेट गुमाइसकेको थियो। तर, चुन्दनगापोयिल र साइमन अनवारले पाँचौं विकेटका लागि १ सय रनको साझेदारी गरेका थिए। ४१.२ ओभरमा रिज्वन ४५ रनको व्यक्तिगत स्कोरमा आउट भएपछि आएका मोहम्मख बोतासँग मिलेर अन्वारले छैटौं विकेटका लागि ८० रनको साझेदारी गरेपछि युएईले सम्मानजनक स्कोर बनाएको हो।

नेपाली कप्तान पारस खड्काको बलमा उपकप्तान ज्ञानेन्द्र मल्लको हातबाट क्याचआउट हुनुअघि अन्वारले ७० बलमा ९ चौका र २ छक्काका साथ ८७ रनको उत्कृष्ट इनिङ खेले। बोता ३१ बलमा ५९ रनमा अविजित रहे। कप्तान मोहम्मद नाभिदले पनि अविजित ११ रन बनाए।

बलिङतर्फ कप्तान पारस र करण केसीले २–२ विकेट लिए। सोमपाल कामी र सन्दिप लामिछानेले १–१ विकेट लिए ।