बैतडी – जिल्ला स्वास्थ्य कार्यालय बैतडीको आर्थिक वर्ष २०७४/०७५ सम्मको तथ्यांकअनुसार जिल्लामा  २०७  जना एचआईभी संक्रमित फेला परेका छन् ।

एचआईभी संक्रमितमध्ये नियमित रुपमा एआरटी सेवा लिने ११० जना बिरामी रहेका जिल्ला स्वास्थ्य कार्यालय बैतडीका सूचना अधिकारी भुवन जोशीले जानकारी दिनुभयो । एचआईभी संक्रमितहरुले जिल्ला अस्पताल गोठलापानी, पाटन र मेलौली प्राथमिक स्वास्थ्य केन्द्रबाट संक्रमितले निःशुल्क एआरटी सेवा लिइरहेका छन् ।

विभिन्न लाञ्छनाका कारणले समाजमा संक्रमित बिरामी खुल्न हिचकिचाउने गरेको पाइएको छ । असुरक्षित यौनसम्पर्क र सुई, सिरिञ्जबाट लागूऔषध प्रयोगकर्ता एचआइभीको उच्च जोखिममा छन् । कामका लागि विदेश गएकाहरुबाट पनि एचआईभी सरेको भेटिएको छ । समाजबाट अपहेलित हुने डरका कारण खुल्न नसकेका कतिपय संक्रमित एआरटी सेवाबाट वञ्चित भएका छन् ।

एक पटक एआरटी सेवा लिएपछि जीवनभर लिइरहनुपर्ने भएकाले केही संक्रमितले सेवा लिन नमान्ने गरेको बताइएको  छ । विशेषगरी भारतबाट काम गरेर फर्किने नेपालीमा धेरै एचआईभी÷एड्सको संक्रमण देखिएकाले सिमानामा सचेतना फैलाउने अभियान सञ्चालन गर्नुपने देखिएको छ  ।

भारतमा रोजगारी गर्न जाने नेपालीहरुलाई यस बारेमा सचेतना जगाउनुपर्ने स्थानीय जानकारहरु बताउँछन् ।