काठमाडौं : संयुक्त राष्ट्रसंघले बजेट कटौती गरेको भन्दै तीन महिना नबित्दै अफ्रिकी मुलुक कंगोबाट फर्काइएका १ सय ५० जना शान्ति सेनालाई नेपाली सेनाले शान्ति स्थापनार्थ दक्षिणी सुडान पठाउने पक्रिया सुरु गरेको छ।

एक वर्षका लागि गत असार अन्तिम साता अफ्रिकी मुलुक कंगो गएकामध्ये १ सय ५० जनालाई तीन महिना नबित्दै राष्ट्रसंघले असोज २३ गते नेपाल फर्काएको थियो। सेनाले राष्ट्रसंघले बजेट कटौती गरेपछि फौज फिर्ता भएको दाबी गरे पनि फर्किएर आएकाले भने राष्ट्रसंघसँग उचित समन्वयको अभावमा फिर्ता हुनुपरेको गुनासो गरेका थिए। त्यसबेला सेनाले फर्किएकाहरूलाई छिट्टै अर्को मिसनमा पठाउने आश्वासन दिएको थियो।

कंगोबाट फर्किएका एक सय ५० जनालाई पनि समेटेर सेनाले सात सय जनाको टोली दक्षिणी सुडान पठाउन लागेको हो।

सोहीबमोजिम सैनिक नेतृत्वले कंगोबाट फर्किएकालाई पहिलो प्राथामिकता दिएर दक्षिणी सुडानमा पठाउन लागेको हो। सैनिक प्रवक्ता सहायक रथी गोकुल भण्डारीले कंगोबाट फर्किएको फौजलाई दक्षिणी सुडान पठाउन लागिएको बताए। कंगोबाट फर्काइएका १ सय ५० जनालाई मुख्यालयले सकेसम्म छिटो सुडान, कार, लेबनान वा मालीलगायत मिसनमा पठाउने आश्वासन दिएको थियो।

दक्षिणी सुडानमा कार्यरत फौजको एक वर्षको अवधि सकिएकाले प्रमुख सेनानी सुधीर केसीको नेतृत्वमा ७ सयको फौज त्यहाँ जाँदै छ। कंगोबाट फर्किएका एक सय ५० जनालाई पनि सेनाले सोही टोलीमा राखेको हो। पहिलो लटमा बिहीबार राति २ सय ३३ जनाको टोली दक्षिणी सुडान गएको छ। गत असोजमा शान्ति स्थापनार्थ अफ्रिकी मुलुक कंगोमा खटिएकामध्ये फर्काइएका एक सय ५० जनालाई समेत सम्मिलित गरेर कुल ७ सय सैनिक दक्षिणी सुडान जानेछन्।

एक वर्षका लागि असार अन्तिम साता शान्ति सैनिकका रूपमा कंगो गए पनि प्राविधिक कारण देखाउँदै उनीहरूलाई झन्डै १० महिनाअघि गत असोजमै फर्काइएको थियो। कंगोमा अहिले सात सय नेपाली शान्ति सेना कार्यरत छन्। सैनिक मुख्यालयले कंगोबाट फर्किएकालाई समेत पुनः तालिम दिएको थियो। राष्ट्रसंघीय शान्ति मिसनअन्तर्गत प्रमुख सेनानी गौतमको नेतृत्वमा आठ सय ५० जना सैनिक अधिकारी असार अन्तिम साता कंगो गएका थिए।अन्नपूर्ण