काठमाडौं । ड्युटिमा रहेका प्रहरीले एक व्यक्तिमाथि निर्घात कुटपिट गरेको भिडियोका विषयमा अनुसन्धान सुरु भएको छ । सामाजिक सञ्जालमा आएको भिडियोमा बर्दी लगाएका एक प्रहरीले ती व्यक्तिलाई लात्ताले हानेर ढालेको देखिन्छ ।
नजिकै प्रहरीले चेकिङ गरिरहेको र त्यहीँ सामु उभिएका व्यक्तिलाई ती प्रहरीले निर्घात कुटपिट गरेको उक्त भिडियो चितवनको रहेको खुलेको नेपाल प्रहरीले जनाएको छ ।

जिल्ला प्रहरी कार्यालय चितवनले पनि भिडियो चितवनकै भएको पुष्टि भएको र घटना पुस १५ गतेको भएको प्रहरी अनुसन्धानबाट खुलेको छ । प्रहरीका अनुसार बसेनी अस्थायी प्रहरी बिटका प्रमुख समेत रहेका प्रहरी सहायक निरीक्षक (असई) बुद्धिबहादुर घर्ती भुजेलले ती व्यक्तिमाथि कुटपिट गरेका हुन् । चितवन प्रहरीको अनुसन्धानबाट असई भुजेलले नै प्रहरी आचरणविपरीत कुटपिट गरेको खुलेपछि निलम्बनको प्रक्रिया थालिएको छ ।