काठमाडौं । प्रधानमन्त्री केपी शर्मा ओली यही मंसिर १७ गते चीन भ्रमणमा जाँदै छन् । उनले चीन भ्रमणमा जानुअघि पूर्वप्रधानमन्त्री, पूर्वपरराष्ट्रमन्त्री र मन्त्रीहरुसँग छलफल राखेका छन् ।

छलफल आज बिहान ११ बजे प्रधानमन्त्री तथा मन्त्रिपरिषद्को कार्यालय सिंहदरबारमा हुनेछ । चीन भ्रमणको क्रममा राख्ने एजेण्डाबारे प्रधानमन्त्री ओलीले छलफल गर्न लागेको उनको सचिवालयले जनाएको छ ।

प्रधानमन्त्री ओलीले पछिल्लोपटक सत्ता सम्हालेको १०० दिनसम्म पनि भारतबाट भ्रमणको निम्तो नपाएपछि चीन भ्रमणको गृहकार्य सुरु गरेका हुन् ।

प्रधानमन्त्री ओलीले गत शुक्रबार दरबारमार्गमा आयोजित पार्टीको सभामा भनेका थिए, ‘सरकारको टोली १७ गते चीन जान लागेको छ र त्यो भ्रमण सफल हुनेछ । कसरी सफल भयो भन्नेबारे म फर्केपछि सम्प्रेषण गर्ने नै छु ।’