बाँके । बाँकेको नरैनापुर गाउँपालिका–६ गंगापुर कुदरबेटवामा नालामा डुबेर आमाछोरीको ज्यान गएको छ ।

स्थानीय सिंगैया नालामा पानीको सतह कम भएपछि मंगलबार राति जमुनीबाट कुदरबेटवा घर फर्किने क्रममा छोटेलाल यादवकी श्रीमती ३० वर्षकी सेमदोली यादव र ८ वर्षकी छोरी अञ्जली र ३ वर्षकी छोरी सुनिता यादव नालामा डुबेर बेपत्ता भएका थिए ।

बेपत्ता मध्ये आमा र छोरी अञ्जलीको बुधबार बिहान शव फेला परेको जिल्ला प्रहरी कार्यालय बाँकेका प्रहरी निरीक्षक वीरबहादुर थापाले जानकारी दिए ।

बेपत्ता सुनिताको खोजी भइरहेको प्रहरीले जनाएको छ । छोटेलाल यादवलाई पनि नालाको पानीले बगाएको थियो तर उनले ज्यान जोगाउन सके पनि परिवारका सदस्यलाई भने बचाउन सकेन्न ।