दाङ । प्रहरीले दाङको राजपुरको जंगलबाट पाँचवटा एक नाले भरुवा बन्दुक बरामद गरेको छ । प्रहरी चौकी चङ्गुवा दाङबाट प्रहरी सहायक निरीक्षक नरबहादुर खड्काको कमाण्डमा गस्ती गएको प्रहरी टोलीले राजपुर गाउँपालिका–७ को भित्री सिक्टा जाने बाटोको जंगलबाट बन्दुक बरामद गरेको हो ।

दाङका निमित्त प्रहरी प्रमुख भुवनेश्वर तिवारीका अनुसार गस्तीको प्रहरी टोलीले ६/७ जना व्यक्तिले हातमा एक नाले भरुवा बन्दुक बोकेर जंगल तर्फ गएको देखेपछि पक्राउ गर्न खोज्दा उनीहरु बन्दुक छोडेर भागेका थिए ।

प्रहरी टोलीले त्यहाँ खानतलासी गर्दा केपसहित लोड गरिएको पाँचवटा एक नाले भरुवा बन्दुक बरामद गरेको हो । फरार भएकाहरुको खोजी र घटनाको बारेमा थप अनुसन्धान भइरहेको निमित्त प्रहरी प्रमुख तिवारीले जानकारी दिए ।